Aït Menguellet

Artiste / groupe : Aït Menguellet
Genre : kabyle
Vrai nom : Abdenbi AïT MENGUELLET
Naissance le : 16/01/1950

Paroles : Neǧǧa-yawen amkan / Aït Menguellet     Ajoutées par : b_music

Bɣiɣ ad d-inniɣ ad yefsus wul-iw,
Ur teṣɛaḍ wi yenɣiɣ, ugadeɣ tili-w...

Lbaḍna ur telli, anwi ur nettwali ?
tjerḥ tmuɣli n wid yesusmen,
tqublem tizi, tedlam-d ass-agi,
tufam-d ur yelli i yesefṛaḥen,

Kesn-awen amkan wid ur nettṣeḍḥi,
ur d-awen d-ǧǧan awal ad d-yalli,
ass mi la katen, nenwa ɣef tdukli,
seg wass mi ɣ-tteksen, nugwi ad d-nemmekti,

Kra i d-yebwi iḍelli, yečča-t wass-agi,
tegwra-d tmuɣli i mmis n tjaddit,
lsas yergagi, ṣeqf ineggi,
wissen ma d-yegwri wa d-yerren tiqit... ?

Neǧǧa-yawen amkan, ma d-nekwni neshel,
ṣeggemt-aɣ-d kan ayen akk i neɣḍel,
d-kunwi i yeẓṛan, tennam nedderɣel,
ayen i kwen I ɣebban, I ɣunzat laɛqel,
deg wass tḥefḍem, deg iḍ tfeṛḍem,
ṣebḥ tṣefḍem, d-acu iwumi tcefum ?
kul ma tedreɣlem, ur temyaɛqalem,
abrid mi tzeglem, fellaɣ i treffum,

Neǧǧa-yawen amkan a ṛeḥba imencaf,
a wid yeserkan ula d-ixulaf,
d-kunwi i yebɣan awelh ɣer lkaf,
ayen i d-awen yelhan, ɣiwlet isuraf,

D-acu i d-tesnulfam ? D-acu iwumi telham ?
tkeṛhem lewqam, degwen wer yelli,
mi tebḍam axxam, d-acu i d-aɣ tenɣam ?
d-ayen iwumi tsemmam "tagmatt", "tadukli"...

Neǧǧa-yawen amkan a wid ur nemɛin,
a widak yeṛẓan tibbura yellin,
a wid i ṛekḍen sekra n wayen yemɣin,
taftilt di caɛlen, a-tt-id ssexsim,

A wid i tetten deg wuksum nsen,
A wid i tessen idamen n wuxxam,
A wid yesusfen tament deg i sasnen,
A wid yesmaren ssem di leqlam,

Neǧǧa-yawen amkan a sus n tdukli,
tekker-d ad d-tban, mi d-ussam teɣli,
ayen akk i d-yegwran, tebḍam-t d-leṣfuf
mi terram laman i zedɣ-it lxuf,
ɣas ma la nettrus ɣef leqḍaɛ n lmus
ɣurwen nezga nxuṣ, d-kunwi i yelhan
d-iman-nneɣ nɛus, ur nettak afus,
ɣas akken drus, d-kunwi i yellan

Neǧǧa-yawen amkan a ṛeḥba n yilem
yidewn azekka ur yesɛi asirem,
neǧǧa-yawen amkan a ṛeḥba n ulac
yidewn azekka yeban-d yestewḥac,
anwa i yettɣaḍen ? ḥeṣlen garawen,
ẓṛan, ssusmen, d-wid yettṣeḍḥin
tekkatem, ḥeḍṛen, tettgallam, umnen,
almi mdeln allen (ɣe)f lbaṭel i ttwalin

Neǧǧa-yawen amkan ɣas ma drus yidwen,
kul agraw yelhan, yeskeṛbit yiwen,
zeddig-it waman, ṣfan mi teddun,
cwiṭ ilefḍan i yesluɣen amdun,
d-lkeṛh ur nemɛin yakk d-yir tismin
i Ia yettdarin deffir tnaṣlit,
ayen yelhan yullin ad d-gren limin
ar t-id seɣlin, a terren dirit,

Neǧǧa-yawen amkan a widak yumsen
amer wid yelhan a-tt-ṣefḍem yissen,
tettɣaḍ Teqbaylit deg yir ifassen
ḥdeṛt i twaɣit a wid tt-ihemlen

Espace commentaires... ajouter le votre