Aït Menguellet

Paroles : Tessḍelmḍ-iyi ur ḍelmeɣ / Aït Menguellet     Ajoutées par : b_music

T-ssḍelemḍ-iyi ur ḍelmeɣ
Γas ḍelmeɣ mebla lebɣi-w
Semḥ-iyi akken d am-semḥeɣ
A tin εzizen fell-i

Lemḥibba-nneɣ tettwaqqed
Di lkanun tegr i wurɣu
S yesɣaṛen tettwassed
Akken yiwen ur tt-isnusu
D ddexxwan deg-genni a d-yebded
Alamma yelḥaq s agu
Times-is a d-teğğ iɣed
Iɣed-nni a t-yeddem waḍu

Iɣed-nni a yeddem waḍu
A ten-izrε zdat wexxam
A d-imɣi lward ad yefsu
Ad imettel di ssifa-m
Nek a d-uɣaleɣ d agu
Sennig-im a m-dehduɣ sslam
Leḥcic a m-yuɣal d usu
Igenni d aεdil fell-am

A d-tas teslit b-bwenẓar
A s-tefk i lwerd lfuḍas
Lebraq a d-iwwet am lefnar
A d-ibeggen ssifa-s
Lehwa-s d-iḥeggun aẓar
D nek a t-id-yaznen fell-as
A tin m’i d-zzin lenwaṛ
Ad am-iliɣ d aεessas

Atan unebdu yebbwḍ-d
Yebbwḍ-d wass-im d wass-iw
Nek seg-genni ad iyi-isfeḍ
Kem a m-yesreɣ afriwn-im
Ğğiɣ-kem ad i t-semḥeḍ
Γas fehm-it deg iman-im
Lemḥibba-w ɣr-m teɣleḍ
Tusa-d tεedda ur teqqim

---