Si Moh

Paroles : Sselṭan / Si Moh     Ajoutées par : b_music

Awin iɛebden Sselṭan,
Netta la iɛebed amkan-is.
Lukan i yettdum wemkan,
Ad idum i win yellan qqbel-is.
Ur yeḍlim win t-id-yeǧǧan,
Asmi i as-yenna deg wawal-is,
Lukan yettḥezzib wemdan;
Ad yewɛu tagara ixef-is.

A win iɛebden imelyan,
Yettaf-iten d lǧaḥd-is,
Fkan-as deg wul laman.
Zzgan ɣer yidisan-is
Farɛun d wid iɛeddan,
Qarun win ikseben rreẓq-is,
Asmi ten-id-wweḍ ɛeddan.
Wi wwin kra di nnaɛc-is.

A win iɛebden ddunit,
S lǧehd n taḍsa-s yettru.
Tikwal ussan-ik ccebḥ-it,
Tikwal ussan d aɣurru.
Tudert-ik agma am targit,
Laɛwam d aɛeddi am waḍu.
Kul mi ara d lal tsebḥit,
Ad taf ṭṭlam yettraǧu

* Transcription : Fahim Mesaouden
* Titre : Sselṭan | Si Moh

---