Aït Menguellet

Paroles : A Mmi / Aït Menguellet     Ajoutées par : b_music

*** Baba-s ***
A mmi leqraya tekfiḍ
Dacu ɣer i k-id-tessuffeɣ
Ayen akw i tεettbeḍ teɣriḍ
Ml-iyi-d ad ak-ferḥeɣ

*** Mmi-s ***
Yenna-d: a baba xtareɣ
Abrid-iw iban-iyi
Usiɣ-d ar ɣur-k a k-cwireɣ
Fk-d rray-ik εiwn-iyi

*** Baba-s ***
A mmi baba-k tzegl-it
Teẓrid ur ɣriɣ ara
Nek llakul-iw d ddunit
Leqlam ur s-zmireɣ ara

*** Mmi-s ***
Yenna-yi-d mačči s leqlam
I k-nniɣ ad i tεawneḍ
Ayen bɣiɣ yecba s axxam
Am axxam idg i tḥekmeḍ

*** Baba-s ***
Lameεna-k tṛuḥ-iyi
Tεedda nnig uqerru-w
A mmi xas s fehm-iyi
Awal yeḥwağ asefru

*** Mmi-s ***
Lameεna ɣef-fid iɣ-iḥekmen

Atnan la ten-nettwali
Dacu i d-izaden deg-sen
Zemreɣ ula d nekkini
Bɣiɣ ula d nekkini
Ad uɣal-aq d yiwen nnsen
Ma yella yebɣa Ṛebbi
Yibbwas a-d-kkeɣ nnig-sen

---